အဖြည့်ခံ


သမ္မာအလင်းရဲ့ ပရိသတ်တွေအားလုံးပဲ မင်္ဂလာပါ။ ကျနော်တို့လည်း အသင်းတော် ကိစ္စတွေရော၊ အခြားမယောင်ရာဆီလူးတဲ့ ကိစ္စတွေကြောင့်ပါ အလုပ်တွေရှုပ်နေရတာနဲ့ တရားဟောချက် အသစ်တွေ မတင်ပေးနိုင် ဖြစ်နေရတာအတွက် တောင်းပန်ပါတယ်။ ဒီနေ့တော့ အဖြည့်ခံဆိုတဲ့ ခေါင်းစဉ်နဲ့ တရားဟောချက်ကို ပရိသတ်ကြီးအတွက် ဘလော့ဂ်မှာ တင်ဆက်ပေးလိုက်ပါတယ်။
ရာဇ၀င်ချုပ်ဒုတိယစောင် ၃၀း၁၇-၂၀ ကိုလေ့လာကြည့်ရင် ခမည်းတော် အာခတ်မင်း သေလွန်ပြီးတဲ့နောက် သားတော် ဟေဇကိမင်း နန်းထိုင်နေတဲ့အချိန်မှာ ဖခင်ရဲ့လက်ထက်က ထာဝရဘုရားအပေါ် ပျက်ကွက်ခဲ့တာတွေကြောင့် ခံစားခဲ့ရတဲ့ ဘေးဒုက္ခတွေကို ဆင်ခြင်နှလုံးသွင်းမိပြီး ထာဝရဘုရားကိုသာ ကိုးကွယ်ဆည်းကပ်ဖို့ စိတ်ပိုင်းဖြတ်ခဲ့ပါတယ်။ ( ၆ရာ ၃၀း၁၂ )
အဲဒီနောက်မှာတော့ ဗိမာန်တော်မှာ မီးရှို့ရာယဇ်ကို ပူဇော်ကြဖို့အတွက် ယုဒပြည်၊ က္ကုသရေလပြည်နဲ့ အနီးအနားတစ်ဝိုက်လုံးကို လှုံ့ဆော်ဖို့အတွက် အမိန့်တော်ကို စာပို့လုလင်တွေနဲ့ ပေးလိုက်ပါတယ်။ ဘုရင်ဟေဇကိရဲ့ မှန်ကန်တဲ့ကြံစည်မှုကြောင့် တိုင်းသူပြည်သား အားလုံးကို စိတ်သဘော တညီတညွတ်တည်း ဖြစ်စေဖို့ ဘုရားသခင်က အံ့သြဖွယ် ပြုခဲ့ပါတယ်။ ( ၆ရာ ၃၀း၁၂ )
အဲဒီကာလ မတိုင်ခင်က က္ကုသရေလတိုင်းပြည်ဟာ ဖရိုဖရဲနဲ့ အစိတ်စိတ်အမွှာမွှာ ကွဲပြားနေပြီး ဟိုဘုရင်က ၀င်သိမ်းပိုက်လိုက်၊ ဒီဘုရင်က ၀င်သိမ်းပိုက်လိုက်နဲ့ တကယ့်ကို ၀ါးအစည်းပြေသလို ဖြစ်နေခဲ့ပါတယ်။ ( ၆ရာ ၂၈း၅-၈ )
သို့သော် ဘုရားသခင်ရဲ့ လက်တော်က အဲဒီလို ၀ရုန်းသုန်းကား ဖြစ်နေတဲ့ တိုင်းနိုင်ငံကို အံ့သြဖွယ် စည်းလုံးညီညွတ်စေ ခဲ့ပါတယ်။ ကျနော်တို့ရဲ့ အသင်းတော်တွေ၊ အသက်တာတွေ မငြိမ်မသက်ရှိနေမယ်၊ ၀ရုန်းသုန်းကားဖြစ်နေမယ်ဆိုရင်လည်း သဟဇာတ မျှတစွာ ညီညွတ်လာဖို့ ဘုရားသခင်တတ်နိုင်ပါတယ်။ ဒီလိုနဲ့ အနယ်နယ်အရပ်ရပ်က ရောက်လာကြတဲ့ ပရိသတ်တွေက ဘုရားသခင်ကို ကိုးကွယ်ဝတ်ပြုဖို့ လုပ်ကြတဲ့အခါမှာ မလုပ်တတ် မကိုင်တတ်တဲ့သူတွေ၊ ဘယ်လိုလုပ်ရမယ်ဆိုတာ နားမလည်တဲ့သူတွေ ပါလာကြသလို ဘုရားသခင်ရဲ့ရှေ့မှာ မှန်မှန်ကန်ကန်နဲ့ မလုပ်ဆောင်နိုင်ကြတာကိုလည်း တွေ့ရပါတယ်။ အဲဒီအချိန်ကာလ ပညတ်တရားကာလ တစ်နည်းအားဖြင့် ပဋိညာဉ်တရားဟောင်းရဲ့ ကာလမှာ ဘုရားသခင်ကို ယဇ်ပူဇော်ရာမှာ ပဲဖြစ်ဖြစ်၊ ၀တ်ပြုကိုးကွယ်ရာမှာပဲ ဖြစ်ဖြစ် ဆောင်ရန်၊ ရှောင်ရန်တွေ ဒုနဲ့ဒေး ရှိပါတယ်။ ဘုရားသခင်မိန့်မှာထားတဲ့အတိုင်း တသွေမတိမ်း လိုက်နာဆောင်ရွက်ဖို့ လိုအပ်ပါတယ်။ အကယ်၍ လွဲချော်မှု တစ်စုံတစ်ရာ ရှိခဲ့တာနဲ့ တပြိုင်နက် အသက်ပါ ဆုံးရှုံးတတ်တာကို ၀တ်ပြုရာကျမ်း ၁၀း ၁-၂ မှာ ကြည့်ရင် သိနိုင်ပါတယ်။ အခုလည်း အဲဒီလိုအမှားမျိုးကို သူတို့တွေ ကျူးလွန်နေမိကြပါပြီ။ သူတို့တွေ ဘာဖြစ်သလဲ ဆက်လက်လေ့လာကြည့်ရအောင်။ ( ၆ရာ ၃၀-၁၇-၁၈ )
အဲဒီလို ဘုရားသခင်ရဲ့ ရှေ့မှောက်မှာ အမှားလုပ်မိကြတဲ့သူတွေ၊ သန့်ရှင်းရာဌာနနဲ့ ဆိုင်တဲ့ ပညတ်ချက်တွေကို ဖောက်ဖျက်မိကြတဲ့ မသန့်ရှင်းသူတွေအတွက် အပြစ်လွှတ်ဖို့ ဘုရားသခင်ကို ဟေဇကိမင်းက ဆုတောင်းပါတယ်။ ( ၆ရာ ၃၀း၁၉ )
ကျမ်းစာမှာတော့ အခုလိုမျိုး ထင်ထင်ရှားရှား ရေးသားဖော်ပြထားပါတယ်။ " သို့ရာတွင် ဟေဇိကက သန့်ရှင်းရာဌာန ထုံးစံအတိုင်း သန့်ှရင်းခြင်းမရှိသော်လည်း ဘိုးဘေးတို့၏ ဘုရားသခင်ထာဝရဘုရားကို ဆည်းကပ်ခြင်းငှာ ဘဘောကျသော သူအပေါင်းတို့၏ အပြစ်ကို ကောင်းမြတ်သော ထာဝရဘုရားသည် လွှတ်တော်မူပါစေသော " ဟု ထိုသူတို့ အဘို့ ဆုတောင်းသဖြင့်-----
ဒီနေရာမှာ ကျနော်အဓိက ထောက်ပြချင်တာ အချက်(၃) ချက်ရှိပါတယ်။
(၁) သန့်ရှင်းရာဌာနထုံးစံအတိုင်း သန့်ရှင်းခြင်းမရှိသော်လည်း- ( ထုံးစံ )
(၂) ဘုရားသခင်ထာဝရဘုရားကို ဆည်းကပ်ခြင်းငှာ သဘောကျသောသူအပေါင်း - ( ဘုရားသခင်ကိုဆည်းကပ်သူ )
(၃) ကောင်းမြတ်သောထာဝရဘုရား - ( ဘုရားသခင်ရဲ့ စိတ်နှလုံး )
နံပါတ် (၁) ဖြစ်တဲ့ " သန်ရှင်းရာဌာနထုံးစံအတိုင်း သန့်ရှင်းခြင်းမရှိသော်လည်း " ဆိုတဲ့အချက်က ကျနော်တို့ အသင်းတော်တွေ၊ ဂိုဏ်းဂနတွေရဲ့ လုပ်ရိုးလုပ်စဉ်တွေ၊ အစဉ်အလာတွေကို ထောက်ပြနေတာဖြစ်ပါတယ်။ တစ်ခါတရံမှာ သခင်ယေရှုကို ၀တ်ပြုကိုးကွယ်တဲ့နေရာမှာ - အစီအစဉ်တကျဖြစ်ရေးနဲ့ သတ်မှတ်ချိန်အတွင်း အစီအစဉ်အားလုံး ပြီးစီးဖို့အတွက်ပဲ ကျနော်တိုတွေ တွေး တောကြံဆပြီး ၀တ်ပြုကိုးကွယ်ခြင်း အစီအစဉ်ကို ရေးဆွဲကြပါတယ်။ သန့်ှရှင်းသော ၀ိညာဉ်တော်ကို အလှည့်ကျ တာဝန်ခွဲဝေမှုပုံစံခွက်ထဲမှာ မရမကဆွဲထည့်ဖို့ ကြိုးစားခဲ့ကြပါတယ်။ ဒါ့အပြင် အသင်းတော်တွေရဲ့ သန့်ရှင်း မြင့်မြတ်မှု ပြယုဂ်တွေ ဖြစ်တဲ့ စည်းကမ်း၊ ၀ိနည်းတွေက ဘုရားသခင်ကို ရှာချင်နေကြတဲ့ လေ့လာသူ အသစ်တွေ အတွက် တကယ့်ကို ကြီးမားတဲ့ အဟန့်အတားတွေ ဖြစ်လာစေပါတယ်။ ဒီအကြောင်းအရာကို ပိုပြီးသိချင်ရင်  မဿဲ ၁၅း ၈-၉ မှာလေ့လာကြည့်နိုင်ပါတယ်။
နံပါတ် (၂) ဖြစ်တဲ့ " ဘုရားသခင်ထာဝရဘုရားကို ဆည်းကပ်ခြင်းငှာ သဘောကျသောသူအပေါင်း " ဆိုတဲ့အချက်က ဘုရားသခင်ကို ရှာဖွေလိုသူတွေ၊ သခင်ယေရှုရဲ့ ကောင်းမြတ်ခြင်းကို မြည်းစမ်း လိုသူတွေကို ဆိုလိုခြင်း ဖြစ်ပါတယ်။ ကျနော်တို့ ခရစ်ယာန်တွေရဲ့ ထုံးလမ်းစဉ်လာတွေဟာ သူတို့အတွက် အဟန့်အတား မဖြစ်စေဘို့ အရေးကြီးပါတယ်။ ကျနော်တို့ အသင်းတွေတော်တွေရဲ့ ကြာမြင့်လှတဲ့ ၀တ်ပြုကိုးကွယ်ခြင်း အစီအစဉ်တွေ၊ အသင်းတော်တွင်း စည်းကမ်းသတ်မှတ်ချက်တွေက လေ့လာသူတစ်ယောက်ကို ဆွဲဆောင်နိုင်ဖို့ထက် လွင့်စဉ် ပျောက်ကွယ်သွားဖို့ ပိုပြီးရာခိုင်နှုန်းများ ပါတယ်။ အခုလို ဆိုလိုတဲ့နေရာမှာ လူကြိုက်များအောင် ရှေ့ရှုပြီး အသင်းတော်ကို တည်ဆောက်ရမယ်၊ ရောက်လာတဲ့ ဧည့်သည်ကို စိတ်ကြေနပ်မှုရှိစေမယ့် ဆူလွယ်နပ်လွယ် အစီအစဉ်မျိုးတွေ လုပ်ဆောင်ဖို့ တိုက်တွန်းနေတာ မဟုတ်ပါဘူး။ ၁ကော ၃း၁၀ မှာ တမန်တော်ပေါလုက " ဘုရားသခင်၏ ကျေးဇူးတော်ကို ငါခံရသည်နှင့်အညီ လိမ္မာသောဗိသုကာကဲ့သို့ တိုက်မြစ်ကိုချပြီ လို့ဆိုထားတာကို ကြည့်ရင် ကျနော်တို့ရဲ့ အသင်းတော်၊ ၀တ်ပြုကိုးကွယ်ခြင်းနဲ့ ဧ၀ံဂေလိ အစီအစဉ်တွေမှာ နလပိန်းတုံးလို လှေနံဓားထစ်လုပ်ဆောင်ဖို့ မဟုတ်ဘဲ အလိမ္မာသုံးဖို့ ပါးနပ်ဖို့ လိုကြောင်း နားလည်ရပါလိမ့်မယ်။
နံပါတ် (၃) အချက်ဖြစ်တဲ့ " ကောင်းမြတ်သောထာသရဘုရား " ဆိုတာကတော့ ဘုရားသခင်ရဲ့ စိတ်နှလုံးနဲ့ သဘောထားကို ဖော်ကျူးခြင်း ဖြစ်ပါတယ်။ ကောင်းမြတ်တယ် ဆိုတဲ့ ဘုရားသခင်က မိတ်ဆွေတို့၊ ကျနော်တို့ဆီက ဘာကိုမှ ပြီးပြည့်စုံဖို့ မျှော်မနေသလို၊ မတောင်းလည်းမတောင်းပါဘူး။ သူ့ရှေ့ကို တိုးဝင်လာတဲ့ သူတိုင်းဟာ အိုးလွတ်တွေ ချည်းပဲလို့ သဘောပေါက်ထား သူဖြစ်သလို အစဉ်သဖြင့် ဖြည့်ဆည်းပေးချင်တဲ့သူ ဖြစ်ပါတယ်။ ရောမ ၁၀း၎ ကိုကြည့်ရင် ပညတ်တရားဟာ ခရစ်တော်အားဖြင့် ပြည့်စုံခြင်း ရှိတယ်လို့ ဖော်ပြထားပါတယ်။ ဘုရားသခင်က ကျနော်တို့ရဲ့ မပြည့်မစုံဆုတောင်းသံ၊ ကီးမညီအသံမမှန်တဲ့ ချီးမွမ်းခြင်း၊ အိုးနင်းခွက်နင်း အစီအစဉ်တွေကို ပြည့်စုံလုံလောက်တဲ့ ယဇ်ဖြစ်စေဖို့ ခရစ်တော်အားဖြင့် ပြင်ဆင်ပြီးသားပါ။ အားငယ်တတ်တဲ့သူတွေလည်း အားငယ်မနေကြနဲ့။
ဘုရားရဲ့ ရှေ့မှာ အမှားလုပ်မိတဲ့သူတွေလည်း မကြောက်ကြပါနဲ့။ ဟေဇကိမင်းရဲ့ ဆုတောင်းထက် သခင်ယေရှုရဲ့ ဆုတောင်းကပိုပြီး တန်ခိုးကြီးမားပါတယ်။ ရောမ ၈း၃၃
ကျနော်တို့ရဲ့ အသက်တာထဲက မှားယွင်းမှု၊ လွဲချော်မှုတွေကို ခရစ်တော်က ဆုတောင်းပေးနေပါတယ်။ အဓိကအရေးကြီးဆုံးကတော့ အထက်မှာ ဖော်ပြခဲ့တဲ့ ဟေဇကိမင်းလက်ထက်က လူတွေကို ဘုရားသခင်ဆီ နောင်တနဲ့ လှည့်ပြန်လာဖို့က သာအရေးကြီးပါတယ်။ ထာဝရကာလကို ရောက်တဲ့အခါမှာ တစ်ခါမှ အမှားမပြုခဲ့ဖူးတဲ့ သူကိုရွေးပြီး " သာဓု သစ္စာရှိသော ငယ်သားကောင်း " လို့ ဘုရားသခင်က ချီးမွမ်းမှာ မဟုတ်ဘူးဆိုတာ ကျနော်အာမခံပါတယ်။ လဲသော်လည်း ပြန်ထတဲ့သူ၊ မှားသော်လည်း နောင်တရသူကိုသာ ဘုရားသခင်နှစ်သက်ကြောင်းကို ဆာလံ ၃၇း ၂၃-၂၄ မှာ လော့လာဖတ်ရှုကြည့်ဖို့ တိုက်တွန်းရင်း ဒီတရားဒေသနာကို နိဂုံးချုပ်အပ်ပါတယ်။

ကျနော်တို့ရဲ့ မပြည့်စုံမှုတွေကို နားလည်စာနာစွာ ဖြည့်ဆည်းပေးနေသူဟာ ခင်ဗျားတို့ ကျနော်တို့လို လောကီသား တစ်ယောက်မဟုတ်ဘူးဆိုတဲ့ စိတ်ချမှုကို ရရှိစေဖို့ ဘုရားသခင်ကောင်းကြီးပေးပါစေ။

ဆရာဇေယျာ

1 comments:

ဒီတရားဟောချက်က အသက်တာပိုင်းနဲ့ အသင်းတော်ပိုင်း။ ဘယ်ဟာကိုအဓိကထားထောက်ပြနေတာလဲ။ ကြားရခဲ၊ နာရခဲတဲ့တရားဟောချက်ကောင်းတစ်ခုပါပဲ။ သမ္မာအလင်းဘလော့ဂ်မှာပဲဒါမျိုးတွေရှိလို့ အားကိုးပြီးပုံမှန်လာကြည့်ဖြစ်တာပါ။
ပုံမှန်တင်ပေးစေလိုပါတယ်။

Post a Comment

Share

Twitter Delicious Facebook Digg Stumbleupon Favorites